Leef Bacchusvrunj,
Hiej bön ich dan! Bacchus 2026! Ich zal mich aeve veursjtelle. Ich bön Ian Schoolmeesters, 32 jaor, gebaore in 't Veldj, opgegreujd biej de TV tore en ich woon noe al flink get jaore in de binnesjtad. (Vergaef mich mien fout det ich ongerhalf jaor dach det 't Jocusriek ouch leuk waas). Ich wirk biej Broewerie De Klep. Hiej bön ich accountmanager en zorg ich det de Horeca in Nederland, en zeker in Limburg, ontzettend good kwaliteits craftbeer drink! Ich höb naeve 't werk ouch genog hobby's om michzelf good bezig te haaje. Zo padel ich biej NIP mit inkele greun jes, voetbal ich in de zaal mit ein vrunjeteam van FKR, drum ich biej Eddie van Drum4fanatics en sjpeel ich sóndaags in EMS 5, veural veur de derde helf. 't Vastelaovesgeveul is mich mit de paplaepel ingegaote. Zo ging ich al es kleine dreumes mit mien mam, mien zus en aaf en toe mit miene pap vastelaovend viere! De leefde veur de vastelaovend is nooit verdwene en waerde allein mer meer toen ich in 2020 adjudant moogde waere biej Bacchus Max I. ‘t Woor ein ervaring om nooit te vergaete! In 't sezoen 2020 is mien oma helaas gestórve. De sjteun die ich toen ontving binne de Bacchusklup woor zo werm det 't metein veulde es femilie. Ich höb de Bacchusklup dan ouch altied in mien greune hert zitte en bön ich greujts al 5 jaor lid te moge zeen van dees klup. Veer make 't ederjaor legendarisch en 't zal dit jaor veur mich nog legendarischer waere.
Genog gewazel euver mich. Ich wil uch gaer mien adjudante veursjtelle!
Adjudante:
Max Munnicks.
Netuurelik begin ich mit Max Munnicks ofwaal Bacchus Max I oet 2020.
Max en ich kinne ós al vanaaf de kleuterklas. Veer höbbe same de bassissjool doorloupe. Jaomer genog ging Max nao ein angere middelbare sjool, mer veer zorgde d'r veur det ós ketak in sjtandj bleef. Veer ginge beveurbeeld de neudige aovende op sjtap om ein glaeske beer te drinke en nuujtjes oet te wissele. In 2020 moogde ich ziene adjudant zeen. Eine tied dae veer nooit zólle vergaete. Nao zien Bacchussjap höbbe Max en zien vriendin Andrea ein kiendje gekrege mit de naam Dax. Mesjien waal 't meis bezunjere moment van mien laeve woor det Max aan mien deur sjtong same mit Andrea om te vraoge of ich paeter zou wille waere van hunne zoon! Max zit vol positieve verrassinge en is zonger twiefel ein van de meis dierbare miense in mien laeve!
Bob Homan.
Hae is ein legende in de maak! Miense zólle 'm kinne es barman en bedeningsmedewirker van Hotel en Grand Café De Pauw of mesjiens waal van de sjtad. Bob is namelik neet vies van ein drenkske en is vaak euveral en nörges te bekinne. Bob en ich höbbe ós lere kinnen biej De pauw. Hiej woore veer collega's en merkte veer det veer good mid ein door ein deur kóste. Dit resulteerde in völ sjtapaovende, fekansie en onvergaetelikke momente same. Tip van de Bacchus: Gaef deze man eine microfoon en doe höbs de ganse aovend vermaak.
Nick Beckers.
Nick en ich gaon wiet truuk in 't verleje. Zo woonde veer in dezelfde wiek en höb ich ‘m nog baeter lere kinne door Max! Veer kwome vaak mit dezelfde groep biejein om te drinke en sjaele zeiver te verkaupe. Nick is eigenaar van Hollands Kaas Centrum Wagenaar-Beckers. Veur völ miense welbekind oppe mert, ut Munsterplein en nog meer plekke in Limburg. Door zien ongernaemerssjap is Nick eine drökke man, mer ich durf mit volle zekerheid te zègke det deze man altied veur mich klaor sjeit es ich 'm zol belle.
Mien doel: Ich wil d'r dit jaor ein gigantisch fees van make in gans Remunj en omsjtreke.
Enne, laefse nog?!
