Beste Vastelaoves sjoemers!
Hiej bön ich dan, eur nuuje Bacchus van 2020! Mien eljers höbbe mich op 9 fibberwarie 1994 de naam Max Munnicks gegaeve. Jao det beteikend det ich 25 jaor aad bön, poehpoeh ich heur uch dinke, det is eine jonge God!
Maar good, de meiste miense zólle mich toch waal kinne van Kefee De Pauw oppe Roerkade in Remunj. Hiej werk ich (mit kleine oetsjtepkes) zo'n 9 jaor al. Ich vinj 't ech gaaf det es geer mich gaot verzoepe, dit biej De Pauw in de veurtuin (of viever. Is maar net wie se dit bekieks) gaot doon.
Of ich hobbies höb? Maar zeker, in miene vrieje tied vinj ich 't herelik om de horeka aaf te sjoeme maar dan aan de angere kantj van 't buffet of aan ein taofel mit vaöl te bikke. Zo doon ich es 't zönke sjient gaer ein groot sjtök vleis oppe BBQ ligke. Verder bön ich (ouch in sjlechte tieje) vriej fanetiek PSV supporter en reis ich die men ouch in Europa waal ins achternao om der maar ein sjtejtrip aan vas te plekke mit mien vader(euver dae aje van mich sjrief ich zo nog ein sjtök).
Wis geer, det ich mam häör vastelaovend van 1994 höb verkloot? Zie meinde zich alles geregeld te höbbe mit Willy van Allebenaör, toet ich mich bedach det ich det jaor de vastelaovend wól mitmake en toen bön ich de goonsdaag daoveur gebaore.
DE Bacchusvraog waas dan ouch metein de vraog of det ich miene grótste vastelaoveswins in vervulling wól laote gaon. Mien mótto is de letste jaore heel duudelik veur sómmege geweas. Prins NAE, Bacchus JAO. Próttekolle zeen neet zo aan mich besjteed, ich laot 't gaer op zien beloup gaon.
Aad Bacchus Dennie I haet mich op eine dónderdaag wiej ich aan 't werk waas gevraog of ich de nuuje Bacchus wól waere. Ich zék 't uch, ich weit noe waat vrouwluuj veule mit eine opvleeger. Ich kreeg 't der sjpontaan werm vanne toen Dennie mich det vroog!
Ich zal uch ins veursjtelle aan de bubs die ich om mich haer verzameld höb.
Ten eerste: Eric Munnicks
Waat zal ich hiej ins euver sjrieve...? Eric is miene pap al bienao 26 jaor (zal 't ouch altied blieve). Pap is gebaore in 1959, mit zien 60 jaor (ja sorry pap) höb ich hem dan ouch gevraog of hae miene sjefäör wilt zeen. Ich zék 't uch, veurdet ich 't vroog zei der al JAO!
Hae wirk al 25 jaor biej Sekisui Alveo en de letste periode hiejvan op 't laberatorium, woor hae alle gemaakte SJOEM naokiek of alles ouch klop. Verder is hae al jaore miene PSV kammeraod, zo höbbe veer al aardig get tripjes same gemaak om ós klubke te bekieke. Hae is al diek 41 jaor same mit mien moder en wone ze al ich weit neet wiejlang in de binnesjtad van Remunj. Pap duit in ziene vrieje tied gaer mit 't fietske door Midde-Limburg fietse en hilt zich verder nog bezig mit 't óngerwerp: '2de Waereld Oorlog in Remunj' en dao kinne heel vaöl miense hem dan ouch van.
Ten tweede: Nadine Meijs
Sorry Uule, ich höb häör ein jaor van uch aafgenaome! Nadine is 26 jaor aad en höb ich lere kinne oppe scouting in 't Kitsuule riek, tich jaor geleje (wie veer nog klein en ónsjöldig ware). Daonao mekaar jaore neet gezeen en in de brökklas oppe Broekhin ós weer taege gekómme. En dao is eine hele gooije vrunjsjap oet gekómme. Vastelaovend zit in häör blood. Zo zit ziej in 't DB van d'n-Uul (sorry Dirk ich kórt 't aaf). En door miene druim höbbe veer de letste jaore al ins ein bietje loupe sjparre, 'waat es ze mich ins vraoge om Bacchus te waere, waat dan?' Hiejdoor waas 't ouch neet meujelik om häör daobiej te vraoge.
Nadine wirk es filiaal manager biej de Kruidvat in Born maar woont waal nog altied in ós sjoon sjtad Remunj, biej mich om de hook zelfs. Ouch ziej is PSV supporter en zo gif det toch nog eine ekstra bandj.
Es lèste, maar det maakt hem neet minder belangriek: Ian Schoolmeesters
Tja, Ian, woor mót ich beginne? Ian is 26 jaor aad en woont ouch net es ós allemaol in de binnesjtad van Remunj. Ich höb Ian lere kinne wiej veer biejein in groep 2 kwame oppe sjool 'Aan de Roer'. Hiejnao höbbe veer alle opvolgende klasse same doorgemaak toet aan de middelbare sjool. Toen mós ich zo neudig nao Broekhin es ein van de weinige van de klas. Maar eavegood höbbe veer kóntak gehaaje. Door zien PSV supportersjap waert ós resepsie op 2 fibberwarie waal get sjpannender want dan sjpeelt PSV in Amsterdam taege Ajax!
Ian is wirkzaam es begleider op ein woongroep nao det hae de horeka ein paar jaor geleje vaarwel haet gezag.
Verder sjoem ich regelmaotig mit hem de Remunjse horeka aaf om te kieke of ós laeverwaerdes nog get opgerèk kinne waere. Vastelaovend viere veer den ouch minimaal eine daag same (normaal gezeen).
Miense, veer zeen ós mit de vastelaovend en dink deraan, sóms höbse SJOEM ZAT gehad...
Bacchus Max I