Bacchus Dennie 1
Beste Miense,
Miene naam is Dennie Nelissen, 41 lentes jónk en gelökkig samewonend mit mien Chickie Chantal Wulms. Veer kóste ós al ongeveer 22 jaor maar oppe kirmes in 2014 (woor angers) sjloog de vónk euver. Twee jaor geleje höbbe veer ós ein kooi gekoch op Hoogvondere. Ich bön trotse vader van twee kienjer Stef(10) en Gwen(6). Daonaeve höb ich nog twee bonuskienjer Jip (14) en Tijn (12). Ein groot gezin waat väöl laeve (én was) in de kooi bringk.
In mien dageliks laeve wirk ich biej de gemeinte Remunj, dao regel ich de kirmese, merte, en sjtandjplaatse, Daonaeve behere veer auch nog de industriehave van Remunj (Jao dae höbbe veer in Remunj) en bön ich vice veurzitter van ’t persjeneel kommitee woorveur ich ónger angere ’t legendarische ambtenarebal jaorliks organiseer. Naeve ‘t helle wirke bön ich regelmatig te vinje biej ‘t kóffiemesjien oppe tweede etaasj van ‘t sjtadhoes aan de Swalmerstjtraot ziej.
Wiej geer al höb gemerk gooije veer ‘t dit jaor auch oppe kirmes. In Remunj sjteit ónger de vastelaovend de aajste Carnavalskirmes van Nederland…iets woor veer es Remunjenere toch waal trots op kinne zeen. Waem is es kleine poet noe neet oppe carnavalskirmes gewaes? Normaal mot ich dit tösse ’t zaat zeen mit dees daag regele, maar dit jaor moog miene kollega Harry de honeurs woornaeme.
In miene vrieje tied perbeer ich aaf en toe ein kerpke te vange en vertoef ich dan auch gaer aan de waterkantj. ‘T leefs mit miene maot Bjorn Emans maar dae wilt nooit mit mich gaon visse want dae vindj mich eine knojer. Naeve ‘t visse voetbal ich biej de veterane van SVC 2000 en in ’t derde van Leeve. Es geer ins op zóndaagmorge nieks te doon höb mot geer maar ins in Leeve kómme kieke. Ich kin oprech zégke det veer enorm sjlech zeen en det veer ein sjlechte aaflevering van comedy capers weurdig zeen.
Daonaeve trek ich der gaer op oet mit Chantal en natuurelik de kids. In en om ’t hoes klommel ich auch gaer (mit of zónger Chantal ;). Natuurelik bön ich neet vies van ein glaas beer….maar det had geer zeker al verwach……
Vastelaovend zit der van kleins aaf aan in. Vreuger mós ich altied mit pap en mam mit nao Harrie Hofman oppe Roerkade. In 1989 bön ich jeugprins gewaore van de Katers oet Neel, in 2007 bön ich dao auch grote prins gewaore. Nao ein rös jaor bön ich dao biej de raod van ellef gegange. Nao ‘t sezoen van 2016 höb ich mich bedank veur de raod van Neel.
Bacchus waere waas veur mich ‘t ultieme vastelaoves doel. Aafgeloupe jaor höb ich mitgedaon aan de zeipkieste race van de Tuinhagedisse. Dao bön ich same mit Harry Beckers enorm oet de boch gevlaoge. (Check de foto) Nao det ze mich in de ambelans de sjtein oet miene reet hadde gehaold höb ich mich ein vaat beer in de nek gegooid. In eine keer sjtinge Bert en Loek naeve mich en vroge of ich Bacchus zou wilde waere.
De volgende daag höb ich Loek opgebeld en gevraog of det serjeus waas. Dju nae….. ich Bacchus…..Nao det ich mich det ins höb laote bezinke en dit mit Chantal had besjpraoke höb ich dao dan auch volmunjig jao op gezag. Noe is ‘t 30 december es ich achter aan de taofel zit te tikke oppe laptop. Euver ein waek geit ‘t gebeure………
Mien adjudante zeen Ruud Franssen, eine kammeraod woor ich vreuger mit höb same gewirk in ‘T Kelderke biej Rini en Frans. Same wirke veer noe biej de gemeinte. En sjloete veer elke borrel zorgvuljig es letste aaf. Es ich taege mam zégk det ich mit Ruudje a.k.a. Choco op sjtap gaon zaet ziej altied ‘’och goddegod’’.
Miene Grote Naef Ron Potter woor ich mien heel jeug daag en nach mit op de voetbalveldjes in Remunj waas te vinje. Ein broor veur mich. De letste jaore zoge veer ós get minder, maar wiste ver waat ver aan elkaar höbbe. Aafgeloupe jaor op Sjtasiefrustrasie höbbe veer same gebuis en hadde veer ‘t d’r euver det ich ooit waal ins Bacchus zou wille waere. Moch det zo zeen dan zou hae adjudant waere…tja biej deze!
Jeffrey Cornelis, ein sjtraotverke van ‘t eerste oer. Eine topvent dae ich via Chantal höb lere kinne en woor ich in eine korte tied eine sjoone bandj mit höb gekrege. Eine echte kammeraod. Veer trékke der regelmatig op oet mit de vrouwluuj, en meistal eindige dees daag zaat in de trein of ein hotel.
Richard eine gast dae ich noe twee jaor kin en al jaore mit de Bacchusklup mittrék. Dae mafkaetel woont in Kroatië en kump bienao elk wiekend euvergevlaoge om dit mit mich te doon. Angerhalf jaor geleje zeen veer op bezeuk gewaes biej Richard en Tamara in Zagreb. Loekie waas toen auch dao en ich dink det dao missjien de basis van dit Bacchussjap is gelag.
Veer gaon der eine super sjoone vastelaovend van make
Laot dich griepe
Waas geteikend:
Bacchus Dennie I
Ron Potter
Ich bön Ron Potter en eine van de 4 adjudante van Bacchus. Ig bön 49 en woon same mit mien maedje Esther en mien 2 kienjer Laszlo en Rachelle. Veer gaon gaer op fekansiej nao Italië en oppe tied ein paar daag d’r tusse oet. Oppe golfbaan bön ich erg dök te vinje in miene vrieje tied. De kós verdeen ich es verkoupleider biej Baetsen Containers en Recycling in Son.
‘T vastelaovesblood kreeg ich al vreug in de sjtamkroeg van miene pap, kefee Hofman oppe Roerkade waat noe kefee ‘De Verleiding’ is. Es kiendj mit de kroeg in vastelaovend viere en tussedoor verkleid nao de kermis oppe mert en natuurelik oppe dinsdaag Bacchus verzoepe, geweldig waas det.
Wie miene naef Dennie mich vroog of ich adjudant wilde waere hoofde ich dan ouch neet lang nao te dinke es echte Remunjse jong. Mien ganse jeug höb ich in Neel gewoond maar zogouw ich mit de fiets nao de sjtad móch waas ich dao neet meer weg te houwe. Voetballe biej Zjwif oppe maashave, sjtappe in de Veldsjtraot en op ‘t sjtasieplein en mit vastelaovend natuurelik ouch baove in de Appelsieneriej.
Ich höb net es Bacchus Dennie I en mien mede adjudante, Ruud, Jeffrey en Richard ontzettend väöl zin om der eine onvergaetelikke sjoone vastelaovend van te gaon make. Loester goot dan ich gaef alvas eine goje raod:
LAOT DIG GRIEPE !!!
Jeffrey Cornelis
Leef vastelaovendsvrunj
Noe de decembermaondj achter ós ligk, kinne veer ós op gaon make veur de échte feesdaag, tied veur de Vastelaovend!
Ich bön Jeffrey Cornelis, 45 jaor jónk… of aad, dit hink aaf van wiej gezellig ‘t de daag daoveur waas. Ich woon in Remunj sins 1998 en bön al meer es 20 jaor same mit mien maedje Ester.
Nao ‘t laevesleech gezeen te höbbe in ‘t Remunjse zeekehoes, höb ich mien jeugjaore doorgebrach in Häör, in ‘t Riek van de Sjaopsköp. Van kiends aaf aan altied Vastelaovend gevierd. De letste jaore sjteeds fanetieker en zeker sinds veer ós eige vereniging, V.V. De Sjtraotverkes aktief bemanne, höbbe veer ech neet genóg aan die 3 daag Vastelaovend per jaor….
In de Vastelaovendloze tied reize weer gaer. Sjtaejetrips en verre fekansies, daor waere veer bliej van. Hawaii, Canada, ‘t vastelandj van de V.S, Mexico, Thailandj, geweldige fekansies mit sjoon herinneringe.
Om de reisjes én de Vastelaovend te kinne bekostige, bön ich wirkzaam es produksieplanner biej Sekisui Alveo in Remunj.
Dennie kin ich noe un tiedje es unne toffe gast wo mit ich väöl raakvlakke höb. De vrundjsjap en ‘t enthousiasme van Dennie én de leefde veur de Vastelaovend ware de reje det ich metein ‘jao’ höb gedach en auch sjnel ‘jao’ höb gezag taege ‘t adjudantsjap (Dennie effe laote zjweite ;-)).
Auch al bön ich ein Sjtraotverke van ‘t eerste oer. Ich gaon d’r van oet det de res van de Verkes ‘t leuk én auch ein eer vindj det ein Sjtraotverke de Bacchusklub dit jaor moog vertegewoordige.
Bacchusvrunj en Vastelaovendsvierders: geneet van de sjoonste tied van ‘t jaor! Ich weit zeker det Bacchus Dennie I en veer es zien adjudante dao ein biejdrage aan gaon levere! Veer höbbe d’r ontzettend väöl zin in!
Laot uch griepe!!
Ruud Frannsen
Leef vastelaovendsvrunj
Nao maonje van zjwiege, moog eindelik de ganse waereld en veural heel Remunj ‘t weite! Ich bön ein van de adjudante van Bacchus Dennie I !!
Zal mich veur ederein dae mich neet kint ff veursjtelle, miene naam is Ruud Franssen, bön 3x11+6 vastelaoves sezoene aad! Mien weeg sjteit in ‘t Katerriek woor ich bön gebaore en getaoge. Nao get omzjwervinge nao de binnesjtad en De Weerd woon ich alweer bienao 11 jaor in Neel mit mien vriendin Gigi Martina en ós twee prachtige meide Fenna (11 jaor) en Mella (8 jaor).
De kós verdeen ich net es Bacchus Dennie I op ‘t Sjtadhoes van Remunj. Jao ech waor, ich haaj van vieze kóffie!
In miene vrieje tied bön ich trainer van de E1 van SVC2000 woor mien dochter Fenna voetbalt. Daonaeve bön ich sentefoekser van Badminton Club Remunj, drink ich gaer ein glaeske beer mit mien vrunj, haaj ich van meziek loestere en op fekansiej gaon. Maar baove alles bring ich ‘t leefs miene vrieje tied door mit mien gezin, al is ‘t toes oppe bank!
Bacchus Dennie I kin ich oet de tied det ich fulltime aan de verkeerde kantj van de bar sjting op ‘t Sjtasieplein bie kefee ‘t Kelderke, inmiddels al meer es 20 jaor geleje! Same höbbe veer dao heel get avonture belaef maar veer höbbe elkaar belaof dao nooit mit eemes angers euver te kalle, helaas. (sjtappe in Mesjtreech, sjtein, winkelroet, veters oet de sjoon, vraog maar aan Ratno van ‘t Bacchushoes ;)))
‘T woor eine zónnige zomerdaag aafgelaupe jaor det Dennie mich vroog ein van zien adjudant te waere. Eerlik gezag kreeg ich geliek penspien van de sjpanning. Veur de vorm höb ich dees vraog toen mit nao hoes genaome maar sjtiekum haaj ich toch al JAO gezag! Sorry Gigi! X
Es adjudant kiek ich oet nao ein geweldig sjoon sezoen, ongerdeil van de BucchusKlub-femieliej mit oos veurgenger Bacchus Dennie I, mede-óngersjteund door adjudante Richard, Ron en Jeffrey.
Det veer maar väöl moge drinke, héél hel moge sjneuvele enne……
LAOT DICH GRIEPE!
Richard Bryce
Leef Vastelaoves vrunj,
Veer höbbe al heel get sjoon planne veur ‘t vastelaoves sezoen en höbbe d’r super väöl zin in! Ich haop heel väöl nuuje en aaij Vastelaoves vrunj te zeen, dus…..
Van alle adjes bön ich waarsjienlik de minst bekinde voor uch, dus zal ich mich ff veursjtelle: Richard Bryce , gebaore op 11-11-1974 in Rotterdam…jao geer laest ’t good, eine Hollender gebaore oppe sjtart van de vastelaovend! Ich bön getrouwd mit Tamara en veer höbbe 3 kids, Isabella (14 jaor), Amy (12 jaor) en Joey (8 jaor). Momenteel wone veer in Zagreb (Kroatie) woor veer door mijne werkgaever ‘Bayer’ oetgezonde zeen om Direkteur te zeen veur ós bisenis in ‘t veurmalige Joegoslavie. In miene vrieje tied gaon ich gaer mit mien gezin op reis en pak ich de neudige ‘Dance festivals’ mit, verder tennis ik gaer en aaf en toe doon ich nog volleyballe. Det waas 20 jaor lank mien passie en ich höb 6 jaor lank mit väöl plezeer in Häör bij HHC gesjpeeld.
Mien vastelaoves verleje is nog vriej jónk, veer zeen in 2004 nao Limburg getrokke toen ich biej Nunhems Zaden (óngerdeil van Bayer) ging wirke en dus kochte veer ein hoes in Hael (in ‘t Gangmaekers riek) woor veer toet 2012 gewoond höbbe. Eedere Vastelaovend ginge veer mit de kids nao alle evenemente van de V.V. Gangmaekers. Destieds ginge veer allein ‘euver de brök’ veur de Sjtasiefestasie, tot ‘t moment dat miene volleybal vrundj Ruud Janssen Bacchus waerde in 2014. Det waas mien ontgreuning biej de Bacchusklup en sins dae tied haet de Remunjse vastelaovend mich ‘gegrepe’ en zeen veer gaer mit al mien vrunj van de Bacchusklup in Remunj. Woor veer op dees waereld auch wone, veer kómme bienao altied nao ’t Bacchusoetrope en blieve dan de ganse vastelaovend buize.
Bacchus Dennie I kin ich pas sins 2014 toen hae mit Chantal get kreeg. Chantal waas al langer ein vriendin van ós en is al väöl langer gaer biej de Bacchusklup. Nao ein paar gooj aovende buize zeen veer vrunj gewaore en höbbe zie ós auch al in Zagreb bezoch! Detzelfde weekend waas toevallig de Wors van de Bacchusklup biej ós in Zagreb en höbbe veer heel ff gesjpraoke euver ein toekomstig Bacchussjap veur Kater Dennie, waarsjienlik haet hae toen in ein bezaope buuj gezag es det gebeurt, det d’r mich zou vraoge es adje. Toch waas ich heel verbaas en vereerd det hae mich belde toen ‘t ech zover waas. Auch al mot ich bienao eeder wiekend op-en-neer vlege, ich doon ‘t heel gaer veur hem en die anger geweldige adjes.
Veer höbbe al heel get sjoon planne veur ‘t vastelaoves sezoen en höbbe d’r super väöl zin in! Ich haop heel väöl nuuje en aaij Vastelaoves vrunj te zeen, dus…..
‘Laot dich griepe!’