Bacchus Tim I van Vlodrop
Leef Bacchusvrunj!
Boh... biej ‘t sjrieve van dees teks gaon mich de kriebels al door de pens...
Ich zal mich aeve veursjtelle. Ich bön Tim van Vlodrop, 31 lentes jónk en vriej gezellig wonend in mien geleefde appartementje in Remunj op eine sjteinworp aafstandj van ‘t Bacchushoes. Mien sente verdeen ich biej UPS in Venlo en in miene vrieje tied bön ich meistal bezig mit meziek, voetballe (kieke of op ‘t veldj), opsjöppe euver mien daakterras of zeurge det de Remunjse kroege good blieve dreije. Daonaeve bön ich in de zomermaondje ouch groot festivalbezeuker.
Ich bön gebaore en getaoge in wereldsjtad Ool en “leep” wiej ich eine maondj of 4 aad waas al mit de optoch mit. Vanaaf toen höb ich geine vastelaovend euvergesjlage en der mót heel get gebeure wilt dao verangering in kómme.
In 2003 bön ich biej de Waterratte adjudant gewaore van nemes minder es ZDH Prins Martijn I en sins dien bön ich dan ouch Waterratte-raodslid, veural betrokke biej de Prinsesjlagers, de ekt van ‘t Prinsoetrope en ‘t dreije van plaetjes.
In 2010 höb ich al ein oetsjtepke richting Bacchusklup gemaak es adjudant van naef Bacchus Marco I, ein on-ver-gae-te-lik jaor. Edere keer es “Kappes en Tabak” weer gedreijd waert bön ich trots det ich daobiej betrókke waas! Daonao waas ‘t tied om zelf oppe veurgrondj te sjtaon en in 2013 bön ich dan ouch Prins van de Waterratte gewaes.
Tja, en den is der veur mich nog maar ein plaats euver op mien vastelaoves-CV en det is Bacchus van Remunj. De jonges van de Bacchusklup kin ich allemaol good es sjtamgaste van kefee De Tramhalte en door mien jaor es adjudant. Toen Bert en Loek mich mit half vaste al vroge waas ‘t antjwaord dan ouch al “jao” veurdet ze de zin hadde aafgemaak. ‘t Wachte haet dus heeeeel lang gedoert en noe bön ich den ouch bliej det ich dit tösse kers en nuuj aan ‘t type bön, op dit moment nog 11 nachjes sjlaope.
Ich höb mien adjudante zorgvuldig oetgekoze op ervaring, entoesjasme, dόrs, dans- en zangkwaliteite en of ze der good oetzeen in ein raos pak. Ze sjtelle zich hiejónger zelf veur.
Veer zeen ós sjnel...
...Sorry Alvas.
Groete,
Bacchus Tim I.
Niek Timmermans
Het moog gaon beginne, eindelik!!!
Ich bön Niek Timmermans, 30 jaor jónk en al aantal jaore wonend in de prachtige binnesjtad van Remunj. Gebaore en getaoge in Herten, Maerum, aan de Riekswaeg. Veur de dagelikse kós wirk ich binnen sjtichting PSW mit miense mit ein versjtenjelikke beperking. Dit wirk doon ich mit väöl leefde en plezeer. Verder voetbal ich biej SHH 4 in Herten (een vrunje team det probeert elke waek baove zich zelf oet te sjteige, maar meistal nao ein oer sjpele de aom al op haet) auch bön ich fanetiek wielrenner en gaon ich gaer de waereld rondj mit miene backpack.
Es kiendj waor ich al geobserdeerd van vastelaovend. Sjmienke en verkleije, ‘t kós neet vreug genóg beginne. De vastelaovend in Maerum en in ’t Träötje (wo ich biej de fanfaar zoot) waor te gek en ich hoste mich get aaf. Einmaol get aajer biej de plékkerskepel in Maerum oppe trompet en de sjuuf. Heerlik vastelaovend mit ein träöt, bön pap en mam eeuwig dankbaar det ze mich dit geleerd höbbe! In 2011 mog ich prins waere in Maerum van C.V. De Plekkers. Eine geweldige tied en eine druim dae oet kwaom. Wiewaal ich eine jonge prins woor van 23 en de jeugprins van de Plekkers eine kop groter waas den mich, zal ich det jaor nooit meer vergaete. Want deze prins is Uniek!!!!!!!
De nuuje Bacchus vroog mich in ‘t jaor 2016 oppe letste daag van Pinkpop of ich ziene adjudant wilde waere. mien gezich veel aope en het woor zo’n 10 sekónde moes sjtil (waat biej mich neet vaak veurkómp). Ich sjprong de nuuje Bacchus in de erm en vertélde volmunjig JAZEKER doon ich det :) Echter de daag later trök in de auto op waeg nao hoes vroog de nuuje Bacchus: wits doe nog waat ich dich giester gevraog höb en t duurde weer ein sekónde of 10 toen ‘t besef (ich gaef de alkehol van de daag derveur de sjöld) nao baove kwoom, wis ich ‘t zeker. Veer gaon in 2017 met dees geweldige Bacchusklup de vastelaovend viere!!
Bacchus Tim en ich kinne elkaar al van vreuger van de legere sjool. Tim woor dan waal ein jaor aajer en zoot op ein angere legere sjool den ich maar toen al zochte veer elkaar op. Mesjien omdet veer toen al wiste det veer dezellefde interese haaie. Tim en ich wore auch de enige 2 kienjer van Herten die veurdet ze nao de legere sjool ginge al een klein veurzichtig beer beukske hadde, en zo get unieks sjöpd netuurlelik eine bandj. De letste jaore is de vrunjsjap allein nog maar versterkt. Väöl same op sjtap en nao festivals toe, get wo veer de kómmende jaore zeker mit door zulle blieve gaon.
Ich wil via dees waeg alle Bacchus vrunj en alle anger geïnterseerde eine geweldige vastelaovend winse met ós fantastische Bacchus Tim 1. Veer gaon ós bes doon Bacchuss Tim I der doorhaer te sjleipe.......(NOT) ;)
O,jao en dan nog ein dink........ SORRY ALVAS.
Rick Hanno
Beste Bacchusvrunj!
Ich had gehaop det ich dit in ein “tweet” kós doon maar dan waas ich noe al bienao klaor gewaes maar helaas! Hiej kump dan get gezeiver euver mich.
Miene naam is Rick Hanno en ich bön gebaore in Leeve en groot gewaore in Neel. Mómenteel woon ich nog in Neel maar bön van plan om op zeer korte termien truuk nao ós sjoon binnesjtad te verhoeze. Nao heel get horeka ervaring aan de verkeerde kanjt van de bar bön ich via Apple veur mich zelf begós. Wo ich op dit moment heel get tied en energie in sjtaek om dao ein sukses van te make. In miene vrieje tied daon ich same mit Bacchus de kroege in Remunj onveilig make en oplette of die auch oppe tied sjloete. Väöl voetbal kieke en sóms zelf per óngelök taege de bal sjtampe. Mountainbiken en snowboarden det letste perbeer ich de Bacchus nog sjteeds aan te lere maar höb hiej weinig sukses biej.
In de zomer doon veer mit zien alle väöl festivals wo altied waal get mis geit. Tente die weg weije oppe zwarte cross, toet ein foute aafsjlaag op Bospop in Weert. Get mit ein baek kaat water en zaat. Nao ein konsert gaon om vervolges nieks van ‘t konsert mit te kriege omdet veer de ganse daag in een sjpesiaal beer kefee höbbe gehange.
Vastelaovend waat kin ich dao euver zégke. Ich höb in al mien jaore 1 jaor gemis en det zit mich nog sjteeds dwars. Sins det ich kin laupe kom ich in de kroeg en es Paete kienjd van aad veurzitter en aad Bacchus Wim wolters waas mien lidmaatsjap van de Bacchusklup neet meer dan normaal. Nao 1 jaor mitgelaupe te höbbe en ein jaor de greune jas aan gehad te höbbe dao wo Timmy euverigens van zaet det dae jas mich vleugels gif, noe de volgende sjtap. Adje van miene beste Kameraod Bacchus Tim 1. De jong dae ich al kin sins det hae op vastelaovends dinsdaag sjnachs om 3 oer biej kefee ‘T kelderke (noe kefee EnZo veur uch kultuur barbare) oppe bar zoot te janke. Nog ein plaetje dan en dan is de vastelaovend ech veurbiej “De Peel in brand” Sjoon is dit, vrunj veur t laeve!
Veer Bacchus Tim 1 de adjes Niek, Bram, Danny en ich zeen fantastische gooj vrunj dus ‘t enige waat ich hiej nog op wil zégke vandaag is! ‘t duurt väöl te lang en auch ich weit ‘t sins half vaste al. ‘t is bienao 8 jannewariej 2017. Veer gaon beginne haaj uch vas want veer kinne weinig grenze!!!!
Auch names mich
Sorry Alvas
Bram Kurstjens
Gojedaag leef miense,
Ich had wörkelik neet gedach det ich ooit ein sjtökske mós gaon sjrieve veur oppe site van de Bacchusklup maar hiej is ‘t dan toch ech.
Veurig jaor ónger ‘t oetrope van de Bacchus sjting ich langs Tim en toen vroog hae tösse 2 glazer beer door: Es ich Bacchus waer, wilse dan miene adjudant waere? Toen zag ich medein al jao want det waas toch maar veur de grap. Toen hae mich de vraog herhaolde oppe Zwarte Cross nao nog väöl meer glazer beer, kós ich hem neet ins versjtaon en begreep hem gaar oet neet. Hae mós ein paar keer oetligke waat hae noe eigelik gevraog had en daonao nog 4 keer zégke det ‘t ech serjeus waas. Toen ich ‘t door had waas ‘t antjwaord netuurelik volmunjig jao!
Maar laot ich neet vergaete mich zelf veur te sjtelle. Ich bön Bram Kurstjens, net 30 gewaore en gebaore in Tegele (neet Venlo, det is heel belangriek!). Ich woon ongertösse al ein dieke 5 jaor in Remunj same met Kim en sins kort zeen veer verhoes om zo, dichter biej ‘t Bacchusdrieve te kinne wone. Helaas is det waal net verder weg van ‘t Sjtasieplein maar det kump waal good. In ‘t dageliks laeve bön ich in Venlo aan ‘t wirke es preduksieplenner en tössedoor hockey ich biej THC in Tegele en doon ich get squashe.
Vastelaovend is mich mit de paplaepel ingegeave en ich vier ‘t edere keer ezzof mien leave dao vanaaf hink. Ervaring höb ich gelökkig ouch al ein bietje. In Tegele bön ich adjudant van de Jeugprins van D’n Oeles gewaes in 1999 en ich bön 11 jaor lid gewaes van de aafdeiling Oeles Toekoms.
Bacchus Timmy en de angere adjudante kin ich intösse al 7 jaor en in dae tied zeen veer gooj vrunj gewaore. Same Fifa sjpele, ein pötje toepe, nao versjillende festivals gaon en neet te vergaete lid van Jeu-des-boules vereniging Petanque Veur Alles! De rooje draod is väöl gezelligheid en ein good glaas beer. Dus ich höb dao alle vertroewe in det dees vastelaovend waanzinnig geit waere.
Res mich allein nog te zégke: Sorry alvas!
Danny Roumen
Whop Whop Whop, Sjtuiter Sjtuiter Sjtuiter.
Eindelik is ‘t dan zo wied det ich mich veur moog sjtelle es ein van de adjudanten van Bacchus Tim 1.
Nao det hae in juli op ‘t sjoonste plekske van dees aerd (de zwarte cross) ónger de BZB band aan mich vroog om same mit hem de vastelaovend te gaon make zo wiej d’r nog nooit gewaes waas en ein van zien Bacchus adjudante wilde waere, zag ich mit väöl ongeluif en vief promiel Grolsch in mien blood netuurelik geliek jao!
Sjmorges wakker waerend in mien tentje mit ein kleffe moel en koppien, besefde ich eigelik pas wie gaaf det ging waere !!!!
Ich bön Danny Roumen, 36 vastelaovende aad en woon same mit mien vriendin Michelle in ‘t Plekkersriek, wo ich teen jaor eine Plekker bön gewaes.
Maar zeker neet onbekint in Remunj want auch dao höb ich elf jaor ein poskode gehad.
In ‘t dageliks laeve besjerm ich de sjtad van Bacchus es brandjwaerman biej de brandjwaer Remunj, wo door ich auch nog heel get uurkes in de sjtad doorbring.
Bacchus Tim 1 en ich höbbe elkaar lere kinne, wiej de tied van lere loupe en legere sjool veurbiej waas, en de tied kwaam det veer aan ‘t óndekke ware waat ‘t echte laeve in heel. Op sjtap gaon, pilskes pakke, vrouwluuj keure enzo enzo......
Vanaaf dae tied ging ‘t eigelik allemaol vanzelf, edere waek waas waal äörges get te doon angers verzónne veer waal get.
Väöl kulterele oetsjtepkes gedaon, fekansies nao Mallorca, oktoberfeeste in München, wiekende Amsterdam, links of rechs ein festival maar toch drejjde ‘t altied maar om ein dink en det waas det glaas beer.
Same vorme veer auch nog ins de ónbetroewbaarste verdediging van SHH 6, wo aan doorzittingsvermoge in de derde helf zeker gein gebrek is.
Ich dink det baovesjtaonde kómbenasie zeker geit leije toet eine dórstige en ónvergaetelikke Vastelaovend !!!!!!
Auch names mich,
SORRY ALVAS !!!!!!!