Bacchus Robert I Hoek
Beste feesbeeste,
Izh zal mich aeve veursjtelle!
Ich bön Robert Hoek, 40 jaor en ouch waal bekind es Hoekie. In ’t dageliks laeve wirk ich biej Electro van Montfort in Lin. Ich wirk hiej es wirkveurbereider en bön al 20 jaor in deens.
In 2001 kwaam ich Vicky Geurts taege nao jaore ‘m neet gezeen te höbbe, wonao veer ós ouch neet meer oet ’t aug höbbe verlaore. En nao ein paar maondj ginge veer dan ouch same wone.
Net es mich is ouch Vicky de vastelaovend mit de paplaepel in gegaeve. Vicky biej de Nachtegale wo ziene pap jaore lang vórs is gewaes en ich op Kitskesberg biej de Kits-Uule. Dus det vastelaovend viere zit biej ós waal good.
Zelf bön ich naodet ich vanoet de jeugraod in 1987 jeugprins waerde biej de Kits-Uule en in 2001 prins waerde op Kitskensberg, noe al 13 jaor aktief biej de Kits-Uule. Inmiddels höb ich ouch es besjtuurslid waal geleerd wie det vastelaoves sjpeel d’r aan toe geit.
Vicky is daonaeve in 2005 nog wienkeuningin gewaes biej de Veldjmuus, waat ouch ein hele sjoone tied waas.
Vanaaf 2001 wiej ich prins waas, had ich eigelik nog maar eine wins waat vastelaovend betrof. En det waas Bacchus waere van groot Remunj.
In 2014 had ich de eer om adjudant te zeen van Jeroen I, waat al aafgesjpraoke waas in 2001 toen Jeroen mich de vot nao haet gedrage es adjudant.
Ich höb dit destieds same mit Bennie en Maarten gedaon en höbbe väöl late uurkes in de sjtad doorgebrach. ’T Jaor van Jeroen I en Bacchus Ruud I, haet eder jaor ein Reunie wo veer netuurelik haer gaon. Wiej veer aafgelaupe jaor in groepe verdeild waerde en in versjillende kefee’s opdrachte móste doon, waas ich aan de beurt om biej kefee Chevalier eine halve liter te atte. Die taak höb ich bliekbaar op ein Bacchus waerdige meneer gedaon. Ich kwaam al vlot in gesjprek mit Loek euver ’t waere van Bacchus.
Mien antjwaord waas kórt: “Es doe mich bels zégk ich jao!” ein tiedje daonao kwaam ich Loek, Bert en Brits taege biej Jill Murpheys, dao sjproke veer d’r weer aeve euver maar aangezeen veer allemaol zo good in de aolie ware, waas ’t versjtenjig om de volgende daag nog aeve kórt te sjloete of det van twee kenj good zoot.
En zo waas ’t dan ouch op 8 augustus aafgelaupe jaor. Vanaaf toen kóste de veurbereijingebeginne wo adjudanten netuurelik es eerste geregeld móste waere. Dao waas ich zo klaor mit, maar wis waal det waere d’r väöl!
Ich bön trots lid van de VVE (Vereniging Van Eigenheimers) nieks angers es eine naam veur ós vrunjegroep die door diek en dun gaon veur elkaar. Dees groep besjteit oet 11 persone wovan 6 kaerels. Eine waert Bacchus dus dan raojt geer al det die anger 5 adjudant zeen. Det waas mit ein paar appjes geregeld wo door ich aan uch veur kin sjtelle es mien adjudante: Jeroen Domburg, Maarten Domburg, Bennie Domburg, Jens America en Erik Ras
Miene sjpreuk “Opblaosbees Bacchusfees” kump door eine tik dae ich höb gekrege door ós zjwumbad toes. Ich kaup eder jaor eine haup opblaossjpul veur in ’t zjwumbad, terwiel ich weit det d’r meer dan zat is, blief ich det toch aansjaffe wodoor se soms tusse ’t opblaossjpul ’t water mós zeuke.
Daonaeve gaon veer al get jaore nao Solar wo ‘Feest DJ Ruud’ al inkele jaore ein optraeje verzorgt en wit wiej ein feesje gemaak mót waere mit zien opblaossjpul. Det maak de keuze veur miene sjpreuk.
Es hobby höb ich nog darte biej DC de Post 3 aan de Kapel. ’T Darte is mich neet es talent mitgegaeve maar gelökkig vinjt ós team ’t belangrieker det veer d’r eder waek ein feesje van make. Dus mitdoon is belangrieker es winne.
Det waas in ’t kórt get euver mich!
Vanaaf dees plaats allemaol eine sjoone Vastelaovend!
Bacchus Robert I
Adjudant Maarten,
Beste luuj,
Ich bön Maarten Domburg, 34 jaor aad en gooje vrundj van Bacchus Robert I. In ’t dageliks laeve wirk ich es kok biej Markt 10 en zorg ich veur de bik. Op Kitskesberg bön ich gebaore maar inmiddels eine sjtadse jong gewaore en woon naeve de brandjwaer oppe singel. ’T Horeca laeve is mich neet vraemd omdet ich al mien ganse laeve in de horeca wirk. Maar ouch biej de Kits-Uule bön ich verantjwaordelik veur de horeca en via dae waeg bön ich dus ouch geine vraemde in de vastelaovend. Ich gaon in de vastelaovend ouch gaer mit mien vrunj d’r op oet.
Ich vinj ’t sjoon det veer mit alle man det fees nog ins moge belaeve maar dan biej de Bacchusklup. Mit dit gezelsjap van vrunj geit det vas good kómme!
Ich wins uch allemaol eine sjoone vastelaovend!
Maarten
Adjudant Jeroen,
Ich bön Jeroen Domburg (34). In ’t dageliks laeve bön ich sociaal pedagogisch hulpverlener en wirk ich biej Gastenhof. Daonaeve bön ich óndanks det ich in Venlo wirk en woon väöl in Remunj te vinje. Dao bön ich gebaore en getaoge dus Remunj verdwient neet oet ’t oug. Ich doon mien pötje voetballe biej EMS en mien pielkes gooje biej DC de Post. Veur ein gezellige aovend droet bön ich waal te vange. Vastelaovend vier ich al mien ganse laeve, maar ich vinj ’t sjoon om det dit jaor ónger de vlag van de Bacchusklup te moge doon! Es sikkertaris van de Kits-Uule weit ich waal wiej ’t vereinigingslaeve ein bietje in elkaar sjtik maar Bacchus is toch ein nuuj ervaring.
Robert kin ich al väöle jaore en veer zeen hele gooj vrunj gewaore in al dae tied. Veer trèkke väöl mitein op, dus det zit deze vastelaovend waal good!
Veer zeen ós waal in de sjtad
Sjoone vastelaovend!
Adjudant Erik,
Biej deze wil ich mich aeve veursjtelle es adjudant van Bacchus Robert I
Miene naam is Erik Ras, ich bön 37 lentes jóngk, gebaore in Valkeswaard en opgegreujd in Budel.
En noe al enige tied woonechtig in Ech same mit miene zoon Ruben.
Vastelaovend vierder in hert en neere en daorom eine echt optochmiens en verder mit de vastelaovend te vinje in Ech en Remunj wo maar get te doon is.
Same mit mien vriendin Inge en ós vrunjegroep “VVE” zeen veer dök in Remunj te vinje.
Ich wirk biej Geelen vastgoed en bouw in Naer/Remunj wo ich mit väöl plezeer d’r op los tummer.
Hobbies zeen fietse en klusse of d’r lekker op oet gaon in ‘t weekend zo wiej sjtappe of nao ‘t veldjrieje te gaon.
Ich kin Robert al ein aantal jaore en höb d’r super väöl zin in om hem te óngersjteune in zien jaor es Bacchus van Remunj en d’r ein ónvergaetelik sezoen van te make.
Vastelaoves groete Adjudant Erik
Adjudant Jens,
Ich bön Jens America ouch waal bekint es Janus. Ich bön gebaore in Haerle maar gelökkig op tied nao Remunj verhoes mit mien elders en broor.
Ich höb jaore in ’t Kits-Uule riek gewoont. Van dao oet bön ich via ein paar omwaege terech gekómme in ‘t riek van de Tuinhagedisse. Dao woon ich same mit mien vrouw Gabriëlle en miene zoon Loet midde in ‘t dörp.
Ich bön eine echte vastelaovesvierder in hert en neere. Vanaaf ‘Zeute dónderdaag’ waat ich al jaore organiseer biej miene werkgaever, De Sligro in Remunj, toet en mit vastelaoves dinsdaag gaon ich op paad.
Ich kin Robert al ein jaor of 32. Veer höbbe same oppe scouting gezaete en jaorelangk biej de boer in Lerop gewirk. Ouch de anger adjes zeen gein onbekinde veur mich. Boete ‘t feit det de breurkes ‘Domburgers’ naeve zeen van mien vrouw, kin ich häör ouch van Kitskesberg. Dae Braobenjer is ein paar jaor geleje kómme aanwejje en oet koelantheid höbbe veer dem opgenaome in ós groep. Veer zeen eine hele goje en hechte vrunjegroep en ich bön zeer vereerd det ich same mit Robert en die anger men ‘t sjpeel van de Bacchus moog sjpele dit jaor.
Ich wins eederein eine hele sjoone vastelaovend. Veer kómme ós vas en zeker taege mit die daag.
Adjundant Janus
Adjudant Bennie,
Hallo
Ich bön Bennie Domburg, 38 jaor aad en woonachtig in Maerum, same mit mien vriendin Chantal en hondj Woef.
Ouch mien kienjer, Lisa en Daan, zeen regelmatig biej ós.
Toen Robert mich de vraog sjtelde, wils doe adjudant waere, dach ich ff
“oh nae, noe alweer”. In 2014 hadde veer mit mien breurke ‘Prins Jeroen I van de Kits-Uule’ ein prachtig en heftig sezoen gehad.
Dus ging ich ein bietje versjlage de vraog sjtelle aan Chantal.
Toen die van de sjrik bekómme waas kós ich maar ein antjwoord gaeve: tuurlik doon ich mit.
Taege eine gooje vrundj kinse netuurelik gein nae zégke en es echte vastelaovesvierder höb ich hiej heel väöl zin in.
Ich bön bliej det ich mit dees groep mit moog doon.
En ich wins Bacchus Robert I väöl succes, want veer zeen neet te sjtoppe mit dees daag.
Sjoone vastelaovend,
Bennie