2015 Bacchus Roland I

Beste Bacchus vrunj,

Ich bön gevraog veur ein sjtökske te sjrieve. Veur de luuj die mich nog neet kinne zal ich mich ins ff veursjtelle. Miene naam is Roland Driesen, gebaore oppe kemp op 7 april 1971.
Wiej ich 2 maondj aad waas, bön ich mit mien elders en zus nao 't veldj verhoes. Dao bön ich ein echte veldjmoes gewaore. Ich höb toet mien 31ste in Remunj gewoont en bön toen de maasbrök euver gegaon. Toen zeen veer in Häör gaon wone. Ich bön getrouwd mit mien jeugleefde Misty Driesen Masseling. Veer zeen al 27 jaor same en van die 27 jaor zeen veer 17,5 jaor getrouwd. Veer höbbe 2 prachtige kienjer, oze jóng Lars van 15 en oos maedje Kiki van 8 . Ich höb sins kort ein nuuj baan in Susteren Biej de 'Web shirt company', ein drökkeriej veur kleijer en sjport sjpulle. Verder höb ich auch nog get hobbies. Ich bön jeugleider van de B1 van KSV Häör en zelf aktief in 't derde elftal. En natuurlik eine gooije pot beer drinke mit mien vrunj haert d'r auch biej.

Miene sjpreuk is: Euver de brök en trök
Mien leedje hit: Vol gaaaaas...

En natuurlik zeen d'r ein paar jonges die op mig moge lette dees kómmende waeke.Mien adjudante zeen dan auch: Mario Kemper oet Leeve, Stefan Cox oet Häör en Francois de Groot van kefee Le Journal oet Remunj.

Mit Dees 3 en mit die greun jeskes en natuurlik mit mich zelf, gaon veer 't dit jaor doon . En natuurlik mit uch, miense …

Alvas eine Sjoone vastelaovend.

Waas geteikend, Roland 1, Bacchus 2015

 

Mario Kemper.

En ich bön Mario Kemper, 36 jaor jonk.Woonachtig in ’t Tuinhagedisseriek same mit Marissa, de mooder van mien grootste trots, Quin (8) en Demi (5). In mien dageliks laeve wirk ich biej Dennenmarken in ‘t Katersriek, dao bön ich de regelnaef  veur alles waat mit Horeca te make haet. Daonaeve bön ich nog geregeld op ‘t voetbalveldj in Leeve te vinje, ich train de F1 wo zoonlief in de sjpaore van pap is getraoje.
Sóndaags  sjravel ich zelf auch nog get achter eine bal aan in ‘t 3de, wo de derde helf
belangrieker is dan winne.

Bacchus Roland I en ich kinne ós al ein  jaor of 20. Roland naom mich vreuger ónger zien hoede wiej ich es 14 jäörig menke same mit hem in het 1ste van VV Beegden moch voetballe.
Wiej Roland ‘t veldj van Beegden verruulde veur  det  van Asenraoj, verloore veer ós eine  tied oet ‘t oug. Toetdet ich Happy Hour in de sjtad ondekte… “Waem sjting dao achter ‘t buufet…?”  Miene aaje mentor Roland!  
Al sjnel sjting ich neet veur  ‘t  buufet maar d’rachter.  Jaore langk höbbe veer dao in de glorietied van La Cave same heel get glaze vol getap en laeg  gebuis.  Eine sjoone tied höbbe veer doa gehad. Miene mentor waas eine echte kammeraod gewaore.

Op ‘t moment dat Roland benaderd waerde om  Bacchus van 2015 te waere, ware veer same op de Pingelcup  in Leeve op 7 juni. Bloodheit waas ’t dae daag! Naodat de keuzekemissie hem det gevraog had sjting d’r get versjrikt veur mich: “Doe raojts nooit waat ze mich net gevraog höbbe???” ‘T 2de waat d’r zégkde waas:” Maar dan bös doe d’r biej!”. En ich natuurlik: “Zeker bön ich d’r biej!!”

 

Stefan Cox 

Miene naam is Stefan Cox en ich bön 45 lentes jonk.
Ich bön inwoner van Höär wo de Sjoapsköp regere. Do woon ich same mit mien vrouw Corine en mien 2 kienjer, Claire 20 en Jules 16. In ‘t dageliks laeve bön ich wirkzaam in Gelaen biej Sabic, ich gaef dao de leijing aan un groep móntäörs en höb de verantjwaording euver ‘t óngerhald waat dao gedaon waert. Zelf doon ich geregeld nog eine pot tennisse mit ein gooij 3de helf, maar ouch doon ich geregeld nog ein flink sjtök wielrenne om get energie kwiet te rake. 

Gebaore es eine kater oet Neel en daonao grootgebrach in ‘t riek van de tuinhagedisse. Väöl luuj zólle mich dan ouch nog kinne es ‘de witte oet Leeve’.
Roland en ich höbbe same op sjool gezaete in Sjwame op de LTS, dao höbbe veer ós lere kinne. Nao dae tied zeen veer ós get jeurkes oet ‘t oug verlaore toet det miene zoon in 2011 jeugprins waerde van de Lemkes in Höär. Roland waas toen net van ‘t daak gevalle en zoot toes. Toen hae heurde det Jules jeugprins waas, kwoom d’r eine aovend biej ós toes en van det moment waas ‘t kóntak weer es vanaajds. 

Noe zeen veer ós bienao edere daag of sjpraeke veer ós. De betreffende aovend nao ‘t pingeltoernooi toen Roland gevraog waas, vroog hae mich of ich adjudant zou wille zeen es hae Bacchus van Remunj zou waere. Ich zei jao maar wis neet wie of waat. Vlak daonao belde hae mich det ich medein nao ‘t wirk mós kómme, hae mós mich get belangrieks vraoge. Toen ich biej hem kwoom keek d’r mich aan en zei: “ ’t is zowiet, wilse miene adjudant waere”. Ich hoofde d’r neet euver te twiefele en ‘t waas róndj. 
Ich bön eine rasechte vastelaovesvierder, en dit jaor make veer d’r ein geweldig vastelaoves sezoen van. Same mit Bacchus Roland 1 en de adjudante Fra, Mario en de Bacchusklup, gaeve veer flink gaas en zitte veer alles oppe kop….

Allemaol eine sjoone vastelaovens same. 

Geteikend,

Stefan alias de Witte

 

Francois de Groot,

Ich dink det de meiste luuj mich waal al ein bietje kinne. Es grootmeister van Café Le Journal woor ich al heel get jaor achter de tap zórg veur ’t lékkerste glaeske beer en tiejes de vastelaovend veur de sjoonste meziek.
Sins 2013 bön ich lid van de Bacchusklup en bön ich greujts det ich dit jaor moog aantraeje es ein van de linker of rechter handj van Bacchus Roland I.

Ich bön gebaore en getaoge oppe Kemp en bön 44 jaor aad.
Inmiddels woon ich same oppe Hambaek mit mien Chantal Vrenken en bön ich de greujtste vader van Nica en Kate.

Waat ich doon veur de kos, zal waal duudelik zeen. Mien horeca hertje ligk op ’t sjtasieplein in mien eige Café Le Journal.

Ich höb d’r in eeder geval zin in en veer gaon d’r eins joon sezoen van make!

Adje Fra.