2013 Bacchus Frans I

Ciao Pazzi,



Wie ich gebaore waerde wis ich eigelik al waat ich ooit zou wille waere ……. Nae neet prins biej de Katers….. dao waas ich te sjlum veur…… nae… Bacchus.. det waas ut. Allein dao höb ich verrektes lang op motte wachte………… Vief jaor lank haet mich eine aan de kop ligke te zeivere …… waat eine zeiver…… Mer noe bön ich ut…… eindelik …….. BACCHUS 2013 en auch nog juubeleijem Bacchus 6x11…… (weit neet of die kinne raekene mer ze zégke ut).

Tja, en wie eine veurgenger ut al zag: Hiej bön ich dan: Bacchus 2013, Frans van der Werf en sjrik neet: 48 jaor, waat eine machtige laeftied. Al bienao 30 jaor same mit Mariette Polmans (oet Zjwame) woo rich auch alweer bienao 19 jaor mit getrouwd bön.
Same höbbe veer eine maedje Nina en eine zoon Simon.

Ich bön gebaore in ut riek van de Veldjmuus ….. dao bön ich gevórmp wie ze det zo sjoon zégke. Maar Remunj waas groter den allein ut Veldj en dus vertrok ich mit 15 jaor, ich ging mien mam en pap achternao, nao ut riek van de Donderböl, wo ich de rest van mien jeug door höb gebrach. Zo es altied mosse op ein gegaeve moment op dien eige bein sjtaon en dus trok ich in biej mien vriendin (Mariette) in ut riek van de Uule. Waat ein laeve höbbe die Uule dao, ich höb allein mer gefees …… en alle kroege bezoch. Ut veurdeil waas det de kefees verrektes doonbiej wore………


Op ein gegaeve moment waerde ós appartementje te klein en vertrokke veer nao ut riek van de Haofgengers. Dao is auch de eerst sjproet gebaore …. Nina en get later Simon.
Doe kins waal zégke ein vruchtbare omgaeving. Mer omdet veer toch ins ein eige hoes wilde kaupe, vertrokke veer nao ut riek van de Katers…… hiej wone veer noch sjteeds, mesjien nao de vastelaovend neet meer, maar dan zeuke veur ós weer ein anger riek oet……………..

Om get oppe bótteram te höbbe, riej ich door de waek eedere daag op en neer nao Arnhem, wo ich es Unit Manager veur Novisec Security Systems wirk. Det doon ich noe al diek drie jaor mit väöl plezeer, want det mosse waal höbbe in dien laeve. In ut weekend en auch door de waek bön ich aktief voetballer, of ja….. kieper bie ut veerde van SVC2000 en trainer veur angere ballevangers. En es ich den noch ins nieks te doon höb, bön ich besjtuurslid bie SVC2000 en bön ich sentefoekser biej ut ‘Contact Oud Mariniers. En es ich den nog nieks te doon höb den sjeur ich op miene vespa door Remunj of op ein anger plaats.

En natuurlik bön ich eine vastelaovespazzi, det zit geweun in mich en auch in de rest van ut gezin…. Want zégk noe eerlik: wo zin nog zoväöl pazzi es mit vastelaovend…..

Mien adjudante höb ich waal zelf oetgezoch, ich kós lekker achtereuver ligke want ze sjtonge in de rie wie ze ut heurde……. Mer ich kós der mer drie oetkeze van de kemissie:

Ff veursjtelle…..
En toet sjloet miene sjpreuk van dit jaor:

Ciao Pazzi

Waas geteikend,
Frans 1, Bacchus 2013



Nina van der Werf



Ich bön Nina van der Werf, 17 jaor en es geer al kint raoje, de Bacchus van dit jaor is miene pap! Es kiendj is de vastelaovend mich mit de paplaepel ingegaeve, ich ging al vreug nao de sjtasiefestasie mit pap en mam mit unne gooije klatsj sjmink oppe kop.
Pap waas ziene Bacchussjaal altied aan mich kwiet, want zonger dae waas mien pekske toen al neet aaf. Ongertösse höb ich miene eige sjaal dae altied om geit. Vreuger höb ich auch al ins op ein podieum gesjtange mit eine Bacchus, namelik oppe sjtasiefestasie mit Bacchus Frits I en mit mien tante Gonnie die toen ein van de adju’s waas.

Dus noe bön ich der helemaol klaor veur en höb der zin in!

Remco Avezaat


Deze jóng is vanne klas van 1988 en gebäöre in 1971. Doon al jäöre get mit de Vastelaovend. Van bühne tieger oppe bontjeäövend, toet Prins vanne Katers mit Vastelaovend 2012.

Ich kan neet zinge en kin gein maot haaje. Es adjudant van Bacchus 2013 bön ich bliej mit de reserve, reserve plek. Want de 2 angere adju’s zeen toch ech waal de meujte waerd! Ich zal trachte deze Bacchus oppe tied te veurzeen van ein sjoon glaas beer. Zien veurkeur is ein kleintje…. Yeah right…

Ouch dit sezoen make veer d’r ein geweldig fees van. As veer allemaol de teks van ’t Bacchusnummer 2013 inne kop kriege, geit dit jaor net as al die angere in de beuk es ein prachtig sjoon verhaol.

Bert Tobben



Tja, ich dink det de meiste mich waal kinne van De Bacchusklup of van de Tramhalte. In 2002 waas ich al ins adjudant van Eugene I. Vanaaf det moment bön ich neet meer weggegaon biej De klup.
Oppe vastelaovend maondaag trek ich al zo’n 16 jaor mit de Remunjse optoch mit, woorvan de letste 10x onger de naam ‘De Sjonnies’. Dit jaor dus 1x11!
Inmiddels 1x11 jaor later, bön ich nog ins adjudant van Bacchus Frans I (mien naef..).

Ein bezónjer jaor dit keer… Mien vrunj Tim en Herm prins biej de Waterratte en D’n-Uul. Bacchuskluplid Gijs es adju van Herm….Det beloof nog get veur dit sezoen…..
Verder bön ich wirkzaam biej Percom oppe Reuver es ICT kiebus, woor ich naeve Bacchuskluplid en aad prins Loek zit…

In miene vrieje tied doon ich get tennisse en wielrenne (es ’t waer goot is…) En bön ich oppe zóndaag te vinje op de hockey velje… (nae, ich sjpeel ’t zelf neet…)