Hiej bön ich dan. De nuuje Bacchus van Remunj en det auch nog in ein jubileumjaor. Al 7x11 jaor gaon dees greun jes door de sjtad en ich bön heel greuts det ich dit jaor mit die men samen de remunjse vastelaovend onveilig moog maken. Noe vraogt geer uch waarsjienlijk aaf waem ich bön. Mien naam is Mitchell Krause. 31 jaor geleeje gebaore in Brunssum maar zo sjnel als kos nao Remunj verhoesd. Nao mien jonge en get aajere jaore op de Donderberg doorgebracht te höbbe bön ich via de Binnesjtad, Neel en ein jäörke op de Kemp in ut Vriejveld terechtgekomme. Hiej woon ich noe al weer get meer als 3 jaor samen mit, ongertösse mien verloofde, Kim.
Geer zouwt mich missjien kinne herkinne van ein van de vereniginge wao ich actief bön. Jaorelang höb ich rondgerend biej VV de Donderböl. Van Jeugprins tot Raodslid höb ich dao mien vastelaovesopvoeding gehad. Daonaeve bön ich fanatiek (veural in de derde hellef) voetballer en sinds veurig jaor bestuurslid van SV EMS. Ich padel auch nog biej RTC NIP en op vriedigaovend gooi ich ein pielke richting ut dartbord biej Huib aan de Kapel. Dan blaer ich mit de vastelaovend auch nog door eine microfoon. Dae oet de hand gelaupe grap haet de naam B.I.N.K. gekrege en sjlok taegeweurdig ut meiste van miene tied in ut vastelaovesseizoen op. Als ich dan örges ein gaetje in de agenda höb bön ich altied nog waal te vange veur ein feestje of zomers ein sjiek festival zo-es Zwarte Cross of Solar.
Geer kint waal laeze det ich neet heel veul aovende in de waek thoes bön en gezelligheid veur mich veurop steit. Natuurlijk mot d´r auch gewerkt waere en det doon ich op dit moment biej YoungCapital in Eindhoven als Senior Recruiter. Per 1 maart kump dao trouwens verandering en in zeuk ich ut get korter biej hoes. Dan start ich als recruitment specialist biej Rockwool (aan mien nuuje manager, dit is dus de reden det ich pas 1 maart en neet 1 februari kos beginne).
Ich mot d´r neet aan dinke det avontuur allein aan te motte gaon en dus höb ich mich ein paar sjoon men biejein gezocht. Te beginnen met Freek Vos. Freek kin ich al bienao 20 jaor en höb ich via de Donderböl lere kinne. D´r is d´r geine wao ich meer feestjes, vakanties en veural heel veul sjoone momente mit höb mitgemaak. Dae mocht dus sowieso neet ontbraeke. De 2de is Robert Hoek. Eine echte veteraan (nae neet qua laeftied maar waal qua vastelaovend viere). Heel get jaore geleeje lere kinne biej de dartclub en als aad-bacchus natuurlijk ein bron van inspiratie en wiesheid. Dan is dao auch nog Jeroen Domburg. Auch eine echte ervaringsdeskundige op vastelaoves en bacchus gebied. Zowel Jeroen als Robert zitte dus auch biej ut eerder geneumde dartteam en bezorge mich tiedens ut weekend Mallorca en de Dartaovende vaak boekpien van ut lache. Als letste is d´r dan nog Patrick Streutjens. Dae höb ich ooit lere kinne op de middelbare sjool en laot ich zo zigke, ozze humor ligk redelijk op ein lien. Get minder bekint mit de vastelaovend in ein vereniging maar zeer bekint mit ut maximaal viere. Eine fantastische groep wao ich zeker van weit det veer d´r ein prachtig, zjwaor en veural onvergeatelik seizoen van gaon maken.
Zo, noe is d´r genog gezeiverd. Natuurlijk haop ich uch allemaol te zeen op ein van de evenemente van de Bacchusklup of geweun örges in de kroeg. En net op ut moment desse nao hoes gaon kriegse ein pilske in dien henj gedrökt en zaese de legendarische wäörd.. Nog eine mit de jas aan!
