1998 Bacchus Loek I

Bacchus 1998 hit in ut normale laeve Loek Smeets. Hae haet in det jaor Remunj en de Ammie (Amstelclub) oppe kop gezat, same mit ziene adjudant, sjteun en toeverlaot Piet Lucas.
Loek I is eine echte Remunjse jong oet 1962. Gebaore in Eige Haard, en nao jaorelang verblief in Zjwame, Melick en Neel, noe weer woonechtig in de binnesjtad.
As God van de drank haet der ut neet van eine vraemde: zien vader woor de enige echte Herman van Hermans Beerboetiek.
De vastelaovend haet Loek I altied waal in de kleijer gezaete. Vreuger sjpeelde hae in ein Zaate Hermenie, en later waas der regelmaotig te vinje veur of achter de bar. De letste jaore zuusse um nog waal ins biej de Ammie veur de bar as glazehaoler. Euverdaag verdeent der de kôs as systeembeheerder en saoves verduit der ziene tied mit veldjvoetballe biej SVC 5, zaalvoetballe, tennisse of ein bezeukske aan de sauna.

Loek I is vader van twee sjatte van maedjes en zie vergezelle um auch waal ins as der ut podium op kruup om ut Bacchusnummer “Mien Klup” ten gehaore te bringe. In 1998 haet Loek I det nummer meer as hongerd keer gezonge vanaaf menig buffet, sjtoel of tafel. En det haet de verkoup van de bacchussjale eine positieve dreij gegaeve.
De ongersjeijinge van Loek I zeen noe nog sjteeds zeer geleef, al is det allein al om ut feit det dao de vastelaovesdata toet 2047 op sjtaon.
Loek I wins eederein eine sjoone vastelaovend onger ut motto van ziene sjpreuk:
Lach euver vreuger, druim van morge, maar geneet noe.